Kunning til ríkisborgarar úr triðjalondum um viðgerð av persónsupplýsingum í inn- og fráferðarskipanini

Gevið gætur, at inn- og fráferðarskipanin verður sett í verk stigvíst. Tí kann tað í tíðarskeiðinum frá 12. oktobur 2025 til og við 9. apríl 2026 koma fyri, at tínar persónsupplýsingar, harundir biometriskar upplýsingar, ikki verða innsavnaðar í inn- og fráferðarskipanini við øll ytri landamørk í limalondunum. Um tað er eitt krav at savna inn hesar upplýsingar, og tú velur ikki at lata tær, verður sýtt tær at ferðast inn í limalandið. Ímeðan stigvísa verksetingin fer fram, koma persónsupplýsingarnar ikki sjálvvirkandi á ein lista yvir persónar, hvørs uppihaldsloyvi er farið úr gildi. Tú fært heldur ikki møguleikan at kanna, hvussu leingi tú hevur loyvi til uppihald, við at brúka heimasíðuna hjá inn- og fráferðarskipanini ella tólini, ið eru tøk við landamørkini. Tú kanst kanna, hvussu leingi uppihaldsloyvið er galdandi á rokniamboðnum til stutt uppihald á heimasíðuni hjá Evropa-Kommissiónini:
https://home-affairs.ec.europa.eu/policies/schengen/order-crossing/short-staycalculator_da

Tá ið stigvísa verksetingin í inn- og fráferðarskipanini er liðug, verða tínar persónsupplýsingar viðgjørdar sum annars lýst í hesari vegleiðingini.

Í eftirlitinum á ytru mørkunum í limalondunum er skylda at savna tínar persónsupplýsingar fyri at kanna, um innferðartreytirnar eru loknar. Hesar persónsupplýsingar verða savnaðar og skrásettar:

1. upplýsingarnar í tínum ferðaskjali og
2. biometriskar upplýsingar: frá andlitsmynd og fingramerki⁴.

Upplýsingar um teg verða eisini savnaðar úr øðrum keldum, treytað av tínari støðu:

1. upplýsingar úr visumkunningarskipanini í tíni persónligu málsmappu og
2. upplýsingar úr evropeisku skipanini um ferðakunning og ferðaloyvi (ETIAS), serliga tín støða viðvíkjandi ferðaloyvi og tín støða sum partur av familju, um tað er viðkomandi.

—

⁴ Gevið gætur, at upplýsingar um fingramerki hjá triðjalandsríkisborgarum, sum ikki skulu hava visum til innferð í Schengenøkið, og ferðandi við einføldum gjøgnumferðarskjølum eisini verða goymd í inn- og fráferðarskipanini. Um tær tørvar visum til Schengenøkið, eru tíni fingramerki longu goymd í visumkunningarskipanini sum partur av tíni málsmappu og verða ikki goymd aftur í inn- og fráferðarskipanini.

Um tú ikki letur kravdu biometrisku upplýsingarnar við atliti at skráseting, eftirliti ella samleikakanning í inn- og útferðarskipanini, verður tær sýtt innferð við ytru landamørkini.

Limalondini hava atgongd til tínar upplýsingar við tí endamáli at fyrisita landamørk, tryggja lættari ferðslu um landamørk, forða tilflyting og rættarverju. Europol kann eisini fáa atgongd til tínar upplýsingar til rættarverjuendamál. Tínar upplýsingar kunnu, um strangar treytir verða loknar, eisini verða latnar víðari til eitt limaland, eitt triðjaland ella ein altjóða felagsskap, ið er á listanum í fylgiskjali I í reglugerð (ES) 2017/2226⁵, við atliti at aftursending⁶ ella rættarverju⁷.

—

⁵ Ein ST-felagsskapur, Altjóða felagsskapurin fyri flyting (IOM) (Den Internationale Organisation for Migration) ella Altjóða Reyða Kross nevndin (ICRC) (Den Internationale Røde Kors Komité).

⁶ Grein 41, stk. 1 og 2, og grein 42.

⁷ Grein 41, stk. 6.

Tínar upplýsingar verða goymdar í inn- og fráferðarskipanini í nevndu tíðarskeið og verða síðani sjálvvirkandi strikaðar⁸:

1. Skrásetingar av hvørjari innferð, fráferð og afturvístu innferð verða goymdar í 3 ár frá skrásetingardegnum⁹.
2. Einstaka málsmappan við tínum persónsupplýsingum verður goymd í 3 ár og 1 dag frá seinastu skrásettu innferð, fráferð ella afturvístu innferð, um ongar nýggjar skrásetingar eru í hesum tíðarskeiði.
3. Um eingin fráferð verður skrásett, verða tínar persónsupplýsingar goymdar í 5 ár frá tí degi, títt uppihaldsloyvi er farið úr gildi.

—

⁸ Skalt tú hava visum til innferð í Schengenøkið, verða tíni fingramerki ikki goymd aftur í inn- og fráferðarskipanini, tí tær eru longu goymdar í visumkunningarskipanini.

⁹ Um triðjalandsríkisborgarar, sum eru partar av familjuni hjá flytandi ES/EBS/CH-borgarum, (tvs. hjá ES/EBS/CH-borgarum, sum ferðast til eitt annað land enn landið, har tey eru ríkisborgarar ella longu hava uppihald), og sum fylgja ella fylgjast við ES/EBS/CH-borgaranum, verður hvør skrásett innferð, fráferð ella avvíst innferð goymd í eitt ár frá tí degi, innferðin, fráferðin ella avvísta innferðin er skrásett.

Tú hevur rætt til at spyrja marknavørðin, hvussu leingi er eftir av tínum loyvda uppihaldi í limalandsøkinum. Tú kanst eisini kanna hetta á heimasíðuni: https://travel-europe.europa.eu/ees ella á sjálvavgreiðslutólum, um tey eru tøk á landamørkunum.

Um tú ert í limalandsøkinum longur enn loyvt, verða tínar upplýsingar sjálvvirkandi lagdar afturat á listan yvir eyðmerktar persónar (listi yvir persónar, hvørs uppihaldsloyvi er farið úr gildi). Skikkaðu ríkismyndugleikarnir hava atgongd til listan. Ert tú á listanum yvir persónar, hvørs uppihaldsloyvi er farið úr gildi, kann Heimferðarstýrið (Hjemrejsestyrelsen) útvega sær upplýsingar um teg fyri at kanna, um tú ert ólógliga í Føroyum/Danmark¹⁰. Men um tú kanst vísa skikkaðu myndugleikunum álítandi prógv fyri, at uppihaldið varð longt orsakað av óvæntaðum og álvarsomum hendingum, kunnu tínar persónsupplýsingar verða rættaðar ella endurnýggjaðar í inn- og útferðarskipanini, og tú kanst verða strikaður av listanum yvir persónar, hvørs uppihaldsloyvi er farið úr gildi.

—

¹⁰ Longdin á loyvda uppihaldinum verður ikki útroknað, og frágreiðing til limalondini verður ikki gjørd, tá ið loyvda uppihaldið er farið úr gildi, um talan er um triðjalandsríkisborgarar, sum eru partar av familjuni hjá flytandi ES/EBS/CH-borgarum (tvs. hjá ES/EBS/CH-borgarum, sum ferðast til eitt annað land enn landið, har tey eru ríkisborgarar ella longu hava uppihald), og sum fylgja ella fylgjast við ES/EGS/CH-borgaranum.